Menteri Pendidikan dan Kebudayaan (Mendikbud) Nadiem Anwar Makarim nglantik Prof. Dr. Wayan ‘’Kun ‘’ Adnyana pinaka Réktor Institut Seni Indonesia (ISI) Dénpasar masa bakti 2021-2025, duk rahina Soma (22/3/2021) ring Plaza Insan Préstasi, Gedung Ki Hadjar Déwantara Kementerian dan Kebudayaan, Jakarta. Mendikbud Nadiem ngaptiang mangdané réktor anyar ISI Dénpasar puniki prasida digelis ngamargiang swadharmannyané matitisang perguruan tinggi sané inggil antuk gagelar “Merdeka Belajar-Kampus Merdeka’’. Kruna inggil i riki taler madué kasuksman utsaha nincapang kawagedan utawi sumber daya manusia miwah madué daya saing global.
Prof ‘’Kun ‘’ Adnyana, tatkala katunasin panampén saking Dénpasar sasampuné pelantikan maosang pacang misadia nglaksanayang pangaptin Mendikbud inucap. “Visi Mas Mentri sakadi sané sampun kacihnayang pinaka rénstra Kemendikbud, tur kalimbakang sajeroning perjanjian kinerja sareng réktor, sampun tuges pisan muatang indikator kinerja utama sane musti kaamong olih réktor, kasanggra olih pamangku kepentingan ISI Denpasar utamannyané indik daya saing perguruan tinggi”, sapunika dané nugesang.
Prof Kun taler ngwewehin, lianan ring akses, mutu, miwah relevansi, sané kalintang utama wantah utsaha nincapang daya saing global. “Titiang ngrajegang visi ISI Dénpasar mangdané ring masané sané jagi rauh prasida dados pusat unggulan, sané anut adung ring pawekas pemerintah Provinsi Bali inggih punika sajeroning baga budaya ngadegang Bali Padma Bhuwana (Bali pinaka Pusat Peradaban Dunia), antuk branding Global-Bali Arts and Creativity Hub (G-BACH),” sapunika katlatarang olih Réktor ISI Dénpasar anyar sané naenin dados Kepala Dinas Kebudayaan Provinsi Bali puniki.
Kun taler maosang, ISI Dénpasar wantah perguruan tinggi seni tunggal ring Bali, taler ring Indonesia Tengah, maderbé swadharma sané mabuat miwah utama. “Lianan ring ngamargiang Merdeka Belajar-Kampus Merdeka mangdané prasida ngembasang siswa sané mandiri, kritis, lan kreatif, taler jagi kakinkinang makudang-kudang utsaha sane prasida nincapang lembaga pendidikan tinggi kreatif puniki lamakané sida madué daya saing global. Kawéntenané puniki taler pacang kasokong antuk genah jagat Baliné sané becik taler pinaka waranugraha saking Hyang Widhi. Bali maderbé ékosistem kreatif, lan kapurwan seni sané panjang, taler sampun dados genah campuhan kompetisi global seni budaya. Bali taler sampun maderbé brand sané ngangobin jagat. Punika ngawinang, utsaha nadosang ISI Dénpasar pinaka hub internasional sajeroning babaosan, paiketan, miwah pakilitan seni budaya ring tingkat dunia pacang prasida labda karya.
Indik mutu pendidikan, Guru Besar sejarah seni puniki maosang yéning anggannyané sakasidan pacang nyarengang para maestro seni lan para wagmi (profesional), taler profesional internasional pinaka dosen tamu maprakanti sareng dosen ISI Denpasar ring makasami program studi. “Taler ngucukang Merdeka Belajar-Kampus Merdeka pinaka genah ngamargiang saseleh, cipta karya seni malarapan antuk proyék indepénden, pengajaran ring satuan pendidikan sané pinih alit, prakanti strategis ring jagat industri, lan pengabdian masyarakat tematik. Utsaha nincapang daya saing sampun kakinkinang malarapan antuk ngwangun prakanti ring lembaga pendidikan tinggi lan medan seni/kreatif jagat (arts and creative world),” sapunika dané nlatarang.
Réktor ISI Dénpasar masa bakti 2017-2021, Prof. Dr. Gede Arya Sugiartha percaya pisan yéning Prof. Kun pacang prasida ngénterang ISI Denpasar labda karya masaing ring dunia global, lianan ring nincapang makudang-kudang kainggilan sané sampun prasida kapolihang salami puniki. Nyingakin salampah lakun dané tatkala ngénterang Dinas Kebudayaan Provinsi Bali salami kirang langkung kalih warsa, sampun akéh pisan utpatticitta utawi kreativitas pamargin program miwah kegiatan seni budaya ring aab gering agung puniki, Prof Arya Sugiartha rumasa andel pisan ring kawagedan Prof Kun sané pacang makta ISI Denpasar nuju kampus sané ngawinang krama Baliné sami bangga ring pikayun.
