Réktor Institut Seni Indonésia Dénpasar, Prof. Dr. I Wayan “Kun” Adnyana kasarengin antuk Kepala Kantor Wilayah Kementerian Hukum dan HAM Bali Jamaruli Manihuruk nglinggatanganin Nota Kesepahaman (MoU) indik utsaha perlindungan dan pemanfaatan kekayaan intelektual.
“Salanturnyané, MoU puniki pacang kaanggén dasar mangdané prasida ngaryanin perjanjian kerja sama sajeroning pawangunan unit pelayanan sentra kekayaan intelektual” sapunika kabaosang olih Kepala Kanwil Kemenkumham Bali Jamaruli Manihuruk ring Dénpasar, nenomin rahina Anggara.
Acara nglingga tanganin MoU inucap kalaksanayang sinarengan ring acara Promosi dan Diseminasi Kekayaan Intelektual Paten Pada Wilayah Provinsi Bali sané mamurda “Paten dan Komersialnya”.
Tepengané mangkin, sampun wénten 13 unit pelayanan sentra kekayaan intelektual sané madué sékretariat ring organisasi perangkat daerah (OPD), perguruan tinggi negeri utawi swasta ring sajebag kabupatén/kota ring Provinsi Bali.
“Titiang ngaturang suksma ring ISI Dénpasar sané sampun sareng ring utsaha nangiang séntra kekayaan intéléktual puniki, mangdané i raga prasida nyaring tur nawengin kekayaan intelektual, pamekas ring wilayah Provinsi Bali, sané majanten pacang maguna tur prasida akéh ngrauhang pikolih”, sapunika dané maosang.
Dané taler ngaptiang mangdané para pragina lian ring Provinsi Bali prasida naftarang pakaryannyané lamakané sida katawengin tur nénten kaangkenin olih para jana lian.
Duk punika, Rektor ISI Denpasar Prof Dr I Wayan “Kun” Adnyana ngaturang parama suksma ring Kepala Kantor Wilayah Kementerian Hukum dan Hak Asasi Manusia Bali saha pangremba lianan antuk acara nglingga tanganin MoU inucap, mangdané prasida raris kalanturang antuk nangiang séntra kekayaan inteléktual ring Institut Seni Indonésia Dénpasar.
ISI Denpasar wantah lembaga pendidikan tinggi bidang seni kréatif sané madué 14 program studi sajeroning seni pertunjukan, seni rupa, miwah desain.
“Indiké punika ngawinang iraga i riki madué selah ngembasang pakaryan sane marupa invénsi lan inovatif saha mabuat ngrauhang guna kaya” sapunika dané nlatarang. Kun Adnyana mapangapti mangdané paiketan sané sampun kawangun prasida nuldulin para siswa miwah dosén mangdané sumingkin kréatif lan prasida nglimbakang ékonomi kreatif ring Provinsi Bali.
Dénpasar-Himpunan Mahasiswa Jurusan (HMJ) Program Studi (Prodi) Désain Mode Institut Seni Indonesia (ISI) nyarengin ngruruh wantuan mangdané prasida mapunia ring korban bencana banjir ring Nusa Tenggara Timur (NTT).
Panyatusan busana sané prasida tragia kaanggén kasukserahang olih Rektor ISI Dénpasar Prof. Dr. I Wayan Kun Adnyana ring Yosep Yulius Diaz pinaka Ketua Umum Flobamora Bali ring Gedung Réktorat Kampus ISI Denpasar, rahina Buda 19 Mei warsa 2021. Sané taler nyarengin duk punika wantah Wakil Rektor Bidang Akademik, Kemahasiswaan dan Alumni Dr. A.A. Rai Remawa, M. Ds, Wakil Réktor Bidang Umum dan Keuangan Dr. I Ketut Muka P, M.Si, Wakil Réktor Bidang Perencanaan dan Kerjasama Dr. I Komang Sudirga, M.Hum.
Acara patulung kamanusan sané kamargiang olih mahasiswa ISI Dénpasar puniki wantah yasa kérti anyar anut ring Program Kamanusiaan Merdeka Belajar sané mapakilitan taler ring sasanti Hardiknas 2021, “Serentak bergerak wujudkan Merdeka Belajar”. ” Institut Seni Indonesia (ISI) Dénpasar malarapan antuk rintisan program kemanusiaan merdeka belajar nyihnayang silih tunggil saking 8 sistem belajar kebijakan Merdeka Belajar Kampus Merdeka (MBKM), sapunika kasobiahang olih Rektor Prof. Wayan Kun Adnyana.
Dané nampénin program puniki becik pisan pinaka jalaran mertiwiang program merdéka belajar di kampus. “Titiang bangga pisan santukan parikrama puniki dahating mawiguna. Titiang taler nunas mangdané busana sané kantun prasida kaanggén puniki rauh ring sang sané yukti-yukti muatang” sapunika réktor sané naenin dados Kadisbud Provinsi Bali puniki nugesang.
Duk punika taler, Ketua Program Studi Desain Mode (FSRD) ISI Denpasar Dr. Tjok Istri Ratna C.S., M.Si, maosang, utsaha ngruruh wantuan sané mamurda “Jelujur Asa” puniki wantah pinaka pangiket semangat juang druéné sasamén warga Indonesia”. Parikrama puniki karincikang olih HMJ Program Studi Desain Mode ISI Denpasar saha kalaksanayang ring tigang genah sané malianan” sapunika Ida nlatarang.
Parikrama kakawitin saking tanggal 10 Mei 2021 malarapan antuk acara mupulang panyiuan busana sané kantun prasida kaanggén olih makasami civitas akademika ISI Denpasar. Acara inucap raris kalanturang antuk nyukserahang sumbangan busana ring alit-alit penghuni Panti Dharma Jati II Dénpasar lan para warga ring TPA Suwung, tur kapuputang antuk acara nyukserahang wantuan busana ring korban bencana ring NTT. “Titiang ngaptiang malarapan antuk acara pitulung kamanusan puniki, ISI Dénpasar prasida yukti-yukti mertiwiang kebijakan MBKM tur sareng ngutsahayang visi Kemendikbud-Ristek inggih punika mencetak Pelajar Pancasila untuk dapat mencapai Indonesia Maju,” baos Ida duk punika.
Yosép Yulius Diaz pinaka Ketua Umum Flobamora Bali ngaturang parama suksma antuk uratian ring warga NTT sané dados korban banjir. “Ring NTT wénten 14 kabupaten miwah 1 kota sane katibén bencana. Malarapan antuk wantuan puniki, dané ngaptiang mugi-mugi prasida mapitulung tur ngirangin kalaran warga sané katibén bencana. Titiang pinaka panyadé saking wargi NTT ngaturang suksma antuk wantuan sané marupa busana puniki” Sapunika kabaosang olih Yulius Diaz kasarengin antuk Marselinus Sil Paga pinaka Ketua Crisis Center Flobamora Bali, lan Melkianus Boleng pinaka Sekretaris Crisis Center Flobamora Bali.
Menteri Pendidikan dan Kebudayaan (Mendikbud) Nadiem Anwar Makarim nglantik Prof. Dr. Wayan ‘’Kun ‘’ Adnyana pinaka Réktor Institut Seni Indonesia (ISI) Dénpasar masa bakti 2021-2025, duk rahina Soma (22/3/2021) ring Plaza Insan Préstasi, Gedung Ki Hadjar Déwantara Kementerian dan Kebudayaan, Jakarta. Mendikbud Nadiem ngaptiang mangdané réktor anyar ISI Dénpasar puniki prasida digelis ngamargiang swadharmannyané matitisang perguruan tinggi sané inggil antuk gagelar “Merdeka Belajar-Kampus Merdeka’’. Kruna inggil i riki taler madué kasuksman utsaha nincapang kawagedan utawi sumber daya manusia miwah madué daya saing global.
Prof ‘’Kun ‘’ Adnyana, tatkala katunasin panampén saking Dénpasar sasampuné pelantikan maosang pacang misadia nglaksanayang pangaptin Mendikbud inucap. “Visi Mas Mentri sakadi sané sampun kacihnayang pinaka rénstra Kemendikbud, tur kalimbakang sajeroning perjanjian kinerja sareng réktor, sampun tuges pisan muatang indikator kinerja utama sane musti kaamong olih réktor, kasanggra olih pamangku kepentingan ISI Denpasar utamannyané indik daya saing perguruan tinggi”, sapunika dané nugesang.
Prof Kun taler ngwewehin, lianan ring akses, mutu, miwah relevansi, sané kalintang utama wantah utsaha nincapang daya saing global. “Titiang ngrajegang visi ISI Dénpasar mangdané ring masané sané jagi rauh prasida dados pusat unggulan, sané anut adung ring pawekas pemerintah Provinsi Bali inggih punika sajeroning baga budaya ngadegang Bali Padma Bhuwana (Bali pinaka Pusat Peradaban Dunia), antuk branding Global-Bali Arts and Creativity Hub (G-BACH),” sapunika katlatarang olih Réktor ISI Dénpasar anyar sané naenin dados Kepala Dinas Kebudayaan Provinsi Bali puniki.
Kun taler maosang, ISI Dénpasar wantah perguruan tinggi seni tunggal ring Bali, taler ring Indonesia Tengah, maderbé swadharma sané mabuat miwah utama. “Lianan ring ngamargiang Merdeka Belajar-Kampus Merdeka mangdané prasida ngembasang siswa sané mandiri, kritis, lan kreatif, taler jagi kakinkinang makudang-kudang utsaha sane prasida nincapang lembaga pendidikan tinggi kreatif puniki lamakané sida madué daya saing global. Kawéntenané puniki taler pacang kasokong antuk genah jagat Baliné sané becik taler pinaka waranugraha saking Hyang Widhi. Bali maderbé ékosistem kreatif, lan kapurwan seni sané panjang, taler sampun dados genah campuhan kompetisi global seni budaya. Bali taler sampun maderbé brand sané ngangobin jagat. Punika ngawinang, utsaha nadosang ISI Dénpasar pinaka hub internasional sajeroning babaosan, paiketan, miwah pakilitan seni budaya ring tingkat dunia pacang prasida labda karya.
Indik mutu pendidikan, Guru Besar sejarah seni puniki maosang yéning anggannyané sakasidan pacang nyarengang para maestro seni lan para wagmi (profesional), taler profesional internasional pinaka dosen tamu maprakanti sareng dosen ISI Denpasar ring makasami program studi. “Taler ngucukang Merdeka Belajar-Kampus Merdeka pinaka genah ngamargiang saseleh, cipta karya seni malarapan antuk proyék indepénden, pengajaran ring satuan pendidikan sané pinih alit, prakanti strategis ring jagat industri, lan pengabdian masyarakat tematik. Utsaha nincapang daya saing sampun kakinkinang malarapan antuk ngwangun prakanti ring lembaga pendidikan tinggi lan medan seni/kreatif jagat (arts and creative world),” sapunika dané nlatarang.
Réktor ISI Dénpasar masa bakti 2017-2021, Prof. Dr. Gede Arya Sugiartha percaya pisan yéning Prof. Kun pacang prasida ngénterang ISI Denpasar labda karya masaing ring dunia global, lianan ring nincapang makudang-kudang kainggilan sané sampun prasida kapolihang salami puniki. Nyingakin salampah lakun dané tatkala ngénterang Dinas Kebudayaan Provinsi Bali salami kirang langkung kalih warsa, sampun akéh pisan utpatticitta utawi kreativitas pamargin program miwah kegiatan seni budaya ring aab gering agung puniki, Prof Arya Sugiartha rumasa andel pisan ring kawagedan Prof Kun sané pacang makta ISI Denpasar nuju kampus sané ngawinang krama Baliné sami bangga ring pikayun.
Pinaka utsaha anyar sajeroning nyiagayang genah tur nyinggihang cipta karya dosen, mahasiswa, miwah seniman, Institut Seni Indonesia (ISI) Dénpasar ngamedalang Séntra Kekayaan Intelektual (KI) “Kerthi Widya Mahardika”. Acara puniki kamargiang sapisanan ring Pencanangan Zona Integritas Menuju Wilayah Bebas Korupsi (ZI-WBK) lan Pelantikan Badan Eksekutif Mahasiswa (BEM) ISI Denpasar. Acara inucap kamargiang duk rahina Wrespati, (26/6/2021), ring Studio Média Rekam, Program Studi Televisi Film. Kawéntenan Séntra KI puniki kasarengin antuk utsaha nyiagayang luaran penelitian/penciptaan/pengabdian marupa hak cipta miwah patén sederana majeng ring para angga dosén malarapan antuk kompetisi.
Réktor ISI Denpasar, Prof. Wayan Kun Adnyana maosang, dosén miwah mahasiswa ISI Dénpasar madué kréativitas, inovasi, miwah produktivitas cipta seni sané dahat ngangobin, sakéwanten arang pisan sané ngamargiang pendaftaran kekayaan intelektual antuk napi sané sampun kaembasang punika. Sujatinnyané, malarapan antuk pendaftaran KI, karya sané sampun karipta inucap prasida katawengin antuk hukum, tur prasida polih galah kamonetisasi. “Mangdané prasida mastikayang tur ngajiang karya cipta dosen, mahasiswa, miwah seniman, titiang sampun ngiket pasawitran ring Kanwil Kumham Bali saha ngwangun séntra KI. Lianan ring punika, titiang taler nyiagayang pendaftaran KI pinaka hasil luaran penelitian/penciptaan/pengabdian mandiri olih para angga dosen. Titiang matitisang mangdané salami awarsa puniki, wenten 250 sané nerima sertifikat hak cipta,” sapunika kabaosang olih Réktor ISI Dénpasar sané naenin dados Kepala Dinas Kebudayaan Provinsi Bali puniki.
Séntra Ki ISI Denpasar pacang karemba malarapan antuk program Lembaga Penelitian, Pengabdian kepada Masyarakat dan Pengembangan Pendidikan (LP2MPP). Ketua LP2MPP ISI Denpasar, Dr. Ni Made Arshiniwati, SST, M.Si nugesang, Peluncuran Sentra KI “Kerthi Widya Mahardika” nepék ring purnama sadha kacihnayang antuk pendaftaran kapertama tur pangalihan pemegang hak cipta komposisi musik mamurda “Cinta Kasih Abadi di Bali” sané karipta olih Prof. Wayan Kun Adnyana (lirik), I Komang Darmayuda, M.Si. (lagu), miwah Ketut Sumerjana (musik) ring ISI Denpasar. “Komposisi musik puniki wantah theme song filem televisi legenda Bali “Jaya Pangus” sané kasiarang olih Bali TV. Acara inucap tan lian ring karya FTV sané kalaksanayang antuk paiketan pantaraning Bali TV miwah ISI Denpasar”, sapunika Arshiniwati nyumekenang.
Ring galahé sané pateh, taler kalaksanayang Pencanangan Zona Integritas (ZI) nuju Wilayah Bebas Korupsi (WBK) Fakultas Seni Rupa dan Desain (FSRB) ISI Denpasar. Acara sané kamargiang malarapan antuk bhuwana sabha (luring) miwah ambaralaya (daring) puniki kamiletin olih Inspektur IV Inspektorat Jenderal Kemdikbudristek Mashyur Latief lan Inspektur Iswara, Rektor ISI Denpasar, Wakil Rektor, Dekan FSRD, lan civitas akademika ISI Denpasar. “Pencanangan Zona Integritas puniki wantah palet kaping nem FSRD ISI Dénpasar mangdané prasida molihang silih tunggil wakil unit kerja ring wewidangan Kemdikbudristek lamakané prasida masaing ring ZI-WBK,’’ sapunika wacana sané kamedalang olih Dékan FSRD ISI Dénpasar Dr. Anak Agung Gde Bagus Udayana.
Ring subadéwasané punika taler kamargiang pelantikan BEM ISI Denpasar masa bakti 2021-2022 olih Rektor ISI Denpasar Prof. Kun Adnyana sané kacihnayang antuk panyematan pin garuda ring jas Présiden BEM Chion Ardiyaksa, miwah Wakil Presiden BEM Yangwie McCuaren Lee.
Wakil Réktor bidang Akademik, Kemahasiswaan, dan Alumni Dr.Anak Agung Gede Rai Remawa nartayang yéning organisasi senat mahasiswa ngawit saking periode 2021-2022 mauwah parinama dados Badan Eksekutif Mahasiswa (BEM). Indiké puniki kaaptiang mangdané BEM yukti-yukti prasida dados pamucuk sajeroning mertiwiang Program Pembelajaran Merdeka Belajar-Kampus Merdeka (MBKM) ring ISI Dénpasar. Indika punika sané ngawinang, BEM prasida mapaenjuh malarapan antuk nyarengang makasami organisasi kemahasiswaan miwah makasami mahasiswa sajeroning nyarengin ngamargiang MBKM.
Ketua Senat ISI Denpasar Wayan Gulendra, M.Sn., nampénin becik pamargin acara pencanangan ZI-WBK, pelantikan BEM, miwah peluncuran Sentra KI “Kerthi Widya Mahardika” ISI Denpasar inucap. Inidké puniki pacang dados pangawit sané becik sajeroning mastikayang pelayanan lan pelaksanaan Tri Darma Perguruan Tinggi ring ISI Denpasar prasida mamargi anut adung ring visi sané matitisang mangdané ISI Dénpasar prasida dados pusat unggulan sané madasar antuk dibyadresta utawi kearifan lokal sane inggil ring jagaté madasar antuk MBKM. Lianan ring punika, dané taler ngaptiang mugi-mugi kawéntenané puniki prasida ngawinang moto ISI Denpasar, Global-Bali Arts and Creativity Centre Hub (G-BACCH) labda karya .
